अछाम — श्री विद्या मन्दिर नमुना माध्यमिक विद्यालयमा विगत ९ महिनादेखि विद्यालय व्यवस्थापन समिति (वि.व्य.स) को अध्यक्ष चयन हुन नसकेको विषय सामान्य प्रशासनिक ढिलाइमा मात्र सीमित नरहेको भन्दै गहिरो चिन्ता व्यक्त गरिएको छ। विद्यालयको समग्र व्यवस्थापन, विद्यार्थीको पठनपाठनको शैक्षिक वातावरण र अभिभावकको विश्वाससँग प्रत्यक्ष जोडिएको यो महत्वपूर्ण विषय लामो समयसम्म अनिर्णयमा रहनुले गम्भीर प्रश्न उब्जाएको छ।
सम्बन्धित स्थानीय तहले यस विषयमा अब थप मौनबस्न नमिल्ने बताउँदै तत्काल परिणाम देखिने गरी पहल गर्नुपर्ने माग गरिएको छ। लामो समयदेखि चल्दै आएको ‘प्रक्रियामा छ’, ‘छिट्टै हुन्छ’ वा ‘सहमति हुँदैछ’ जस्ता अस्पष्ट जवाफ अब पर्याप्त नभएको स्थानीय सरोकारवालाहरूको ठहर छ। अब आश्वासन होइन, स्पष्ट मिति, ठोस कार्ययोजना र परिणाम चाहिएको छ।
स्थानीय तहसमक्ष प्रस्तुत गरिएका स्पष्ट मागहरू:
१. ३ दिनभित्र: विद्यालय व्यवस्थापन समिति अध्यक्ष चयन प्रक्रिया हाल कुन अवस्थामा छ र ९ महिनासम्म प्रक्रिया अघि बढ्न नसक्नुको कारण के हो भन्नेबारे स्थानीय तहले आधिकारिक धारणा सार्वजनिक गरोस्।
२. ७ दिनभित्र: विद्यालय प्रशासन, अभिभावक तथा सम्बन्धित सरोकारवालासँग आवश्यक समन्वय गरी अध्यक्ष चयनमा देखिएको अवरोध पहिचान गर्दै समाधानका लागि औपचारिक पहल अघि बढाइयोस्।
३. १५ दिनभित्र: कानुनी तथा प्रचलित प्रक्रियाअनुसार विद्यालय व्यवस्थापन समिति अध्यक्ष चयन प्रक्रिया टुंग्याउन ठोस कार्ययोजना र स्पष्ट समयसीमा सार्वजनिक गरियोस्।
४. १५ दिनभित्रै: ९ महिनासम्म प्रक्रिया लम्बिनुको कारण, यस अवधिमा भएका पहल तथा अब चालिने कदमबारे अभिभावक र स्थानीय समुदायलाई सार्वजनिक रूपमा जानकारी दिइयोस्।
५. समयसीमा पालना नभएमा: सम्बन्धित स्थानीय तह, शिक्षा शाखा तथा जिम्मेवार पदाधिकारीले ढिलाइ हुनुको कारण र आफ्नो जवाफदेहिता सार्वजनिक रूपमा स्पष्ट गर्नुपर्छ।
अब बहाना होइन, परिणाम चाहिन्छ
विद्यालय कुनै व्यक्ति वा समूहको स्वार्थ पूरा गर्ने थलो नभई विद्यार्थीको भविष्य निर्माण गर्ने सार्वजनिक संस्था हो। तसर्थ, विद्यालय व्यवस्थापन समिति अध्यक्ष चयनजस्तो आधारभूत विषय ९ महिनासम्म अनिर्णयमा रहनु कुनै पनि हालतमा स्वीकार्य हुन सक्दैन।
अब निम्न प्रश्नहरूको तथ्य, कार्ययोजना र समयसीमासहित जवाफ दिनुपर्ने अवस्था सिर्जना भएको छ:
* ९ महिनासम्म अध्यक्ष चयन किन हुन सकेन?
* यसमा मुख्य अवरोध कहाँ छ?
* यसको जिम्मेवार निकाय वा पदाधिकारी को हो?
* समस्याको समाधान कहिलेसम्म हुन्छ?
विद्यार्थी, अभिभावक र स्थानीय समुदायको हितलाई ध्यानमा राख्दै विद्यालयलाई लामो समयसम्म नेतृत्वविहीन अवस्थाको अन्योलमा नराख्न आग्रह गरिएको छ। अब स्थानीय तहको जवाफदेहिता भाषणमा होइन, व्यवहार र परिणाममा देखिनुपर्ने माग सामाग्रीका प्रणेता कमल राज अधिकारी (सुशान्त) ले जोड दिएका छन्।