अछाम, ११ चैत २०८२ पञ्चदेवल विनायक नगरपालिका वडा नं. २ ले आफ्नो क्षेत्रभित्रका सार्वजनिक स्थलहरूमा मदिरा सेवन गरी होहल्ला गर्ने र अवाञ्छित गतिविधि गर्नेहरूलाई कडा कारबाही गर्ने चेतावनी दिएको छ।
वडा कार्यालयले आज एक अत्यन्त जरुरी सूचना जारी गर्दै, सार्वजनिक स्थलहरूमा मदिरा सेवनका कारण शान्ति सुरक्षामा खलल पुगेको जनगुनासो बढेपछि यस्तो कदम चालिएको जनाएको छ।
बैठकको निर्णय र कानुनी व्यवस्था
मिति २०८२/१२/११ गते पञ्चदेवल परिसरमा बसेको सर्वपक्षीय बैठकले यस्ता गतिविधिमा संलग्न व्यक्तिहरूलाई प्रचलित कानुन बमोजिम कारबाही गर्न स्थानीय प्रशासन समक्ष अनुरोध गर्ने निर्णय गरेको छ।
सूचनामा उल्लेख भए अनुसार:
- सार्वजनिक स्थलमा मदिरा सेवन र होहल्ला गर्न पूर्ण निषेध गरिएको छ।
- नियम उल्लंघन गर्नेलाई प्रचलित कानुन बमोजिम दण्ड-जरिवाना गरिनेछ।
- साथै, पञ्चदेवल विनायक नगरपालिकाको आर्थिक ऐन, २०८१ को अनुसूची-८ को दफा ११ बमोजिम थप नगद जरिवाना समेत गरिने व्यहोरा वडा अध्यक्ष कृपा बहादुर धामीद्वारा हस्ताक्षरित सूचनामा उल्लेख छ।
वडा कार्यालयले सम्पूर्ण वडाबासीहरूलाई यस्ता गतिविधि नगर्न र नगराउन हार्दिक अनुरोध गर्दै सभ्य समाज निर्माणमा सहयोग गर्न अपिल गरेको छ।