अछाम; पञ्चदेवल विनायक नगरपालिका–२ निवासी तथा वडा कार्यालयमा कार्यरत "नयाँराम आउजी"को स्वास्थ्य अवस्थाबारे सामाजिक सञ्जालमा फैलिएको गलत सूचनाप्रति परिवारले गम्भीर आपत्ति जनाएको छ।
नयाँराम आउजी हाल जिवन र मृत्युको बिचमा संघर्षरत अवस्थामा उपचाररत हुनुहुन्छ। यस्तो संवेदनशील समयमा बिरामी स्वयं र उनका परिवारका लागि एक–एक सेकेण्ड पनि अत्यन्त महत्त्वपूर्ण हुने परिवारको भनाइ छ। तर यथार्थ नबुझी, पुष्टि नगरी सामाजिक सञ्जालमा उहाँको निधन भएको जस्ता भ्रामक पोस्टहरू गरिएकोप्रति परिवार दुखित बनेको छ।
परिवारका अनुसार, उहाँको अवस्था गम्भीर भए पनि अहिलेसम्म निधन भएको छैन। सम्भावना कम भए पनि उपचार जारी रहेको र आशा अझै बाँकी रहेको बताइएको छ। गलत र हतारमा गरिएको पोस्टले परिवारलाई थप मानसिक पीडा पुगेको उनीहरूको गुनासो छ।
परिवारले सबैलाई संवेदनशील विषयमा सत्य तथ्य बुझेर मात्र सूचना साझा गर्न, अफवाह नफैलाउन र यो कठिन समयमा सहानुभूति तथा सहयोग गर्न अपिल गरेका छन् ।