काठमाडौं । लामो समयदेखि बन्द अवस्थामा रहेको ऐतिहासिक गोरखकाली रबर उद्योगलाई पुनः सञ्चालनमा ल्याउन सरकारले औपचारिक प्रक्रिया अगाडि बढाएको छ। स्वदेशी उत्पादनलाई प्राथमिकता दिने तथा रुग्ण उद्योगहरूलाई पुनर्जीवन दिने नीति अनुरूप सरकारी स्तरबाट उद्योगको सम्भाव्यता अध्ययन सुरु गरिएको हो।
गोरखाको मझुवा देउरालीमा अवस्थित देशकै एक मात्र टायर उत्पादक यो उद्योग व्यवस्थापकीय कमजोरी, खराब राजनीतिका कारण र आर्थिक संकटका कारण वर्षौँदेखि पूर्ण रूपमा ठप्प थियो। उद्योग बन्द हुँदा एकातिर टायर आयातमा बर्सेनि अर्बौं रुपैयाँ बाहिरिँदै आएको छ भने अर्कोतर्फ सयौँ नेपालीले रोजगारी गुमाएका थिए।
सरकारले गठन गरेको प्राविधिक तथा विज्ञ टोलीले उद्योगका पुराना मेसिनरीको अवस्था, आवश्यक मर्मतसम्भार, कच्चा पदार्थको उपलब्धता, बजार माग तथा वित्तीय लागतको विस्तृत मूल्याङ्कन गर्नेछ। अध्ययन प्रतिवेदन प्राप्त भएपछि उद्योगलाई सार्वजनिक–निजी साझेदारी (PPP) मोडल वा अन्य उपयुक्त संरचनामार्फत पुनः सञ्चालनमा ल्याउने सरकारी योजना छ।
उद्योग पुनः सञ्चालनमा आएमा नेपाली बजारमा गुणस्तरीय टायरको आपूर्ति सहज हुनुका साथै आयात प्रतिस्थापन र ठूलो संख्यामा नयाँ रोजगारीका अवसरहरू सिर्जना हुने अपेक्षा गरिएको छ।