अछाम: नेपाल टेलिकमले बाजुराको प्रसिद्ध धार्मिक तथा पर्यटकीय क्षेत्र बडिमालिकामा फोरजी (4G) सहितको टावर निर्माणका लागि आवश्यक सामग्रीहरू बडिमालिका क्षेत्रमा पुर्याएको छ।
टेलिकमले नेपाली सेनाको हेलिकप्टरमार्फत अछामको साँफेबगर विमानस्थल हुँदै उक्त सामग्रीहरू ढुवानी गरेको हो। यसअघि बडिमालिका क्षेत्रमा मौसम खराब भएपछि धनगढीबाट सामग्रीहरू साँफेबगर ल्याइएको थियो।
मौसम खुलेपछि मंगलबार हेलिकप्टरद्वारा बडिमालिकाको लौरीविनायकसम्म सम्पूर्ण सामग्री ढुवानी गरिएको नेपाल टेलिकम अछामका प्रमुख राजेन्द्र जोशीले जानकारी दिएका छन्। हाल टावरका लागि आवश्यक पर्ने सबै सामग्रीहरू सम्बन्धित क्षेत्रमा पुगिसके पनि जडानको काम भने सुरु भइसकेको छैन।
