पूर्वी अछामको पञ्चदेवल विनायक नगरपालिका वडा नम्बर ७, पुल्लेतोलास्थित देवकी आधारभूत विद्यालय काटियामा सामाजिक सुरक्षा भत्ता प्राप्त गर्ने लाभग्राहीहरूका लागि परिचयपत्र नवीकरण शिविर सञ्चालन गरिएको छ।
सामाजिक सुरक्षा भत्ताबाट लाभान्वित नागरिकहरूलाई घरदैलोमै सहज रूपमा सेवा प्रदान गर्ने उद्देश्यले यस शिविरको आयोजना गरिएको हो। शिविरमा वडाभित्रका ज्येष्ठ नागरिक, एकल महिला, अपाङ्गता भएका व्यक्ति तथा बालबालिका लगायतका लाभग्राहीहरूले आफ्नो परिचयपत्र नवीकरण गरेका छन्।
यस प्रकारका शिविरहरू स्थानीय तवरमै सञ्चालन हुँदा सेवाग्राहीहरूलाई वडा कार्यालय वा अन्य टाढाका स्थानसम्म पुग्ने झन्झटबाट मुक्ति मिलेको छ र समय तथा यातायात खर्चको समेत बचत भएको छ। स्थानीय सरकारको यस किसिमको नागरिकमैत्री सेवाप्रवाहप्रति स्थानीय लाभग्राहीहरूले खुसी व्यक्त गरेका छन्।
