काठमाडौँ — युट्युब, एक्स (ट्विटर), टिकटक, मेटा र स्पटिफाई जस्ता ठूला सामाजिक सञ्जाल कम्पनीहरूले क्रिएटरको कमाइ (मनिटाइजेसन) मा कडाइ गर्न थालेका छन्। अब प्लाटफर्महरूले केवल भ्युज र फलोअरलाई मात्र नभई मौलिक, उच्च गुणस्तर र व्यावसायिक कन्टेन्टलाई प्राथमिकता दिने गरी नयाँ नियमहरू लागू गरेका छन्।
युट्युबले पार्टनर प्रोग्राममा परिवर्तन गर्दै नयाँ क्रिएटरका लागि १२ महिनामा ८ हजार घण्टा वाच आवर वा ९० दिनमा २ करोड सर्ट्स भ्युज पूरा गर्नुपर्ने कडा मापदण्ड तोकेको छ। त्यस्तै एक्सले 'ओरिजिनल कन्टेन्ट रिवार्ड्स' मार्फत क्रिएटरको आफ्नै मौलिक विचार वा विज्ञता झल्किने सामग्रीलाई मात्र भुक्तानी दिने भएको छ। टिकटक, मेटा र स्पटिफाईले पनि मौलिकता र प्रयोगकर्ताको संलग्नतालाई आम्दानीको मुख्य आधार बनाएका छन्।
अर्कोतर्फ, प्रविधिसँगको बढ्दो भावनात्मक परनिर्भरता रोक्न चीन सरकारले एआई कम्प्यानियन वा भर्चुअल प्रेमी सेवामाथि कानुनी रूपमै प्रतिबन्ध लगाएको छ। नयाँ नियमावली लागू भएसँगै बाइटडान्स, अलिबाबा र टेन्सेन्ट जस्ता दिग्गज चिनियाँ कम्पनीहरूले आफ्ना एआई कम्प्यानियन फिचरहरू हटाउन बाध्य भएका छन्।
नयाँ चिनियाँ नियम अनुसार नाबालिगहरूलाई भर्चुअल पार्टनर वा आफन्त जस्ता एआई सेवा दिन पूर्ण रोक लगाइएको छ। साथै, वयस्क प्रयोगकर्ताहरूलाई पनि उनीहरू मानिससँग नभई एआईसँग कुरा गरिरहेका छन् भन्ने कुरा प्रत्येक दुई घण्टामा अनिवार्य रूपमा स्मरण गराउनुपर्ने व्यवस्था गरिएको छ।
अचानक पूर्वजानकारीबेगर सेवा बन्द हुँदा वर्षौँदेखि डिजिटल प्रेमीसँग जोडिएका हजारौँ चिनियाँ युवाहरू गहिरो तनावमा परेका छन्। घट्दो जन्मदर र जनसाङ्ख्यिकीय सङ्कट झेलिरहेको चीन सरकारले युवाहरूलाई डिजिटल दुनियाँ छाडेर वास्तविक जीवनमै सम्बन्ध गाँस्न र परिवार बसाउन प्रोत्साहित गर्न यो कदम चालेको अनुमान छ।
