काठमाडौँ ! सरकारले डिजिटल सुशासनलाई थप प्रभावकारी बनाउन जन्म, विवाह र सम्बन्ध विच्छेद जस्ता व्यक्तिगत पञ्जीकरणका सूचनाहरू नागरिक एपमा एकीकृत गर्ने प्रक्रिया सुरु गरेको छ। सूचना प्रविधि विभागका अनुसार अबको केही समयभित्रै नागरिकहरूले यी प्रमाणपत्रहरू मोबाइलबाटै हेर्न र प्रयोग गर्न सक्नेछन्।
के-के थपिँदै छन् नयाँ सुविधाहरू?
- पञ्जीकरण सेवा: जन्म, विवाह र सम्बन्ध विच्छेदका प्रमाणपत्रहरू एपमै उपलब्ध हुने।
- शिक्षा र रोजगारी: लोक सेवा आयोगको प्रवेश पत्र र वैदेशिक अध्ययनका लागि आवश्यक 'नो अब्जेक्सन सर्टिफिकेट' (NOC) अन्तिम चरणमा।
- व्यावसायिक प्रमाणपत्र: इन्जिनियरिङ परिषद्ले जारी गर्ने व्यावसायिक प्रमाणपत्र पनि एपमै आउने।
- निजामती विवरण: कर्मचारीहरूको व्यक्तिगत विवरण (PIS) पनि एकीकृत गरिने।
मन्त्रीको निर्देशन: तोकिएको समयभन्दा अगावै काम सक्नु
सञ्चार तथा सूचना प्रविधि मन्त्रालयको कार्ययोजना अनुसार यी सेवाहरू ४५ दिनभित्र सञ्चालनमा ल्याउने लक्ष्य राखिएको भए तापनि सञ्चारमन्त्री डा. विक्रम तिमिल्सिनाले तोकिएको समयभन्दा अगाडि नै काम सम्पन्न गर्न निर्देशन दिनुभएको छ। हाल 'पुलिस क्लियरेन्स रिपोर्ट' एपबाटै डाउनलोड गर्न सकिने सुविधा सुचारु भइसकेको छ।
झन्झटमुक्त सरकारी सेवा
मन्त्रिपरिषद्ले स्वीकृत गरेको ‘शासकीय सुधारसम्बन्धी १०० कार्यसूची’ अन्तर्गत यो योजना अघि सारिएको हो। यसले सेवाग्राहीलाई सरकारी कार्यालय धाउनुपर्ने बाध्यता, समय र लागत घटाउँदै सरकारी सेवालाई थप पारदर्शी र आधुनिक बनाउने विश्वास लिइएको छ।