अहिले विनायकबाटै सेवाग्राहीहरूले एकै दिनमा नागरिकता प्राप्त गर्नुका साथै राष्ट्रिय परिचयपत्रको फारम समेत भर्न पाउने व्यवस्था गरिएको छ। यसअघि राष्ट्रिय परिचयपत्रका लागि सदरमुकाम मंगलसेन (जिल्ला) सम्म धाउनुपर्ने बाध्यता रहेकामा अब विनायकबाटै यो सुविधा उपलब्ध भएपछि स्थानीय बासिन्दालाई ठूलो राहत मिलेको छ ।
के-के छन् परिवर्तन?
समयको बचत: पहिले नागरिकता बनाउन करिब एक हप्तासम्म कुर्नुपर्ने अवस्था रहेकामा अहिले आवेदन दिएकै दिन नागरिकता हातमा पर्ने गरेको छ।
एकीकृत सेवा: नागरिकतासँगै राष्ट्रिय परिचयपत्रको फारम पनि सोही दिन भरिने र फारम भर्ने बित्तिकै राष्ट्रिय परिचयपत्र नम्बर (NIN) समेत प्राप्त हुने कार्यालयले जनाएको छ।
स्थानीय सुविधा: राष्ट्रिय परिचयपत्रकै लागि जिल्ला धाउनुपर्ने झन्झट अन्त्य भएको छ।
दक्ष जनशक्तिको परिचालन
सीमित जनशक्ति भए तापनि कार्यालयले सेवाग्राहीको भीडलाई व्यवस्थापन गर्दै निरन्तर सेवा दिइरहेको छ। हाल कार्यालय प्रमुख मन बहादुर बडुवालको नेतृत्वमा सेवा प्रवाह भइरहेको छ। प्राविधिक पक्ष र फारम भर्ने कार्यमा कम्प्युटर अपरेटर नवीन भट्ट खटिनुभएको छ भने दुई जना कार्यालय सहयोगीहरूले प्रशासनिक कार्यमा सहयोग पुर्याउँदै आएका छन्।
कार्यालयमा सेवा लिन आउने सेवाग्राहीहरूले आफ्नै घरपायक ठाउँबाट एकै दिनमा नागरिकता र परिचयपत्रको नम्बर पाउँदा खुसी व्यक्त गरेका छन्। सडक सञ्जाल र भौगोलिक विकटताका कारण जिल्लासम्म पुग्न समय र पैसा दुवै खर्च हुने गरेकोमा विनायकबाटै यो स्तरको सेवा पाउँदा स्थानीय उत्साहित देखिएका हुन्।