अछाम ! पञ्चदेवल विनायक नगरपालिकाका वडा नम्बर ५, ८ र ९ लाई जोड्ने तालागाडमा पक्की पुल निर्माण हुने पक्का भएको छ। लामो समयदेखिको प्रतिक्षा र स्थानीयको मागपछि करिब ८ करोड ७८ लाख रुपैयाँको लागतमा पुल निर्माणका लागि स्रोत सुनिश्चित भई बहुवर्षीय ठेक्का प्रक्रिया अगाडि बढेको छ।
कर्णाली करिडोर र पूर्वाधार विकासमा तीव्रता
पुल निर्माणसँगै कर्णाली करिडोरको अछाम खण्डमा पर्ने पुल्लेतोला, बारला र कालेकाडा क्षेत्रमा बाह्रै महिना यातायात सेवा सञ्चालन गर्न सहज हुने देखिएको छ। हाल सोही क्षेत्रको चिल्ताडा-भानाकोट खण्डमा ४ करोड रुपैयाँ बराबरको ट्रयाक खोल्ने काम भइरहेको छ भने माथिल्लो दोगाडेमा ७ करोड ४४ लाखको लागतमा अर्को पक्की पुलको निर्माण कार्य पनि जारी छ।
स्थानीयस्तरमा उत्साह
तालागाडमा पुल बन्ने भएपछि यस क्षेत्रको आर्थिक र सामाजिक विकासमा ठूलो सहयोग पुग्ने अपेक्षा गरिएको छ। यस आयोजनाले संघीय सरकारलाई पनि कर्णाली करिडोरको अछाम खण्ड निर्माणमा थप दबाब र प्रेरणा दिने विश्वास लिइएको छ। प्रदेश सरकार र पूर्वाधार विकास कार्यालय अछामको समन्वयमा यसै आर्थिक वर्षभित्र ठेक्का प्रक्रिया टुङ्ग्याएर काम सुरु गरिने जनाइएको छ।
यस गौरवको आयोजनाका लागि पहलकदमी लिने र बजेट विनियोजन गर्ने प्रदेश सरकार एवं सम्बन्धित निकायहरूप्रति स्थानीय सरोकारवालाहरूले आभार प्रकट गरेका छन्।