गोरखा । वैदेशिक रोजगारीको सिलसिलामा संयुक्त अरब इमिरेट्स (UAE) मा रहेका गोरखाका एक युवकको दुःखद निधन भएको छ। गोरखाका २९ वर्षीय दिवस श्रेष्ठको युएईमा ज्यान गएसँगै एउटा परिवारको भरोसा र भविष्यको सपना उजाडिएको छ।
तीन वर्षअघि घरको आर्थिक अवस्था सुधार्ने र सुन्दर भविष्य निर्माण गर्ने अठोटका साथ दिवस परदेशिएका थिए। घरका एकमात्र छोरा उनी परिवारका मुख्य सहारा थिए। गत दसैँमा छुट्टीमा घर आएका दिवसले परिवारसँग खुसी साटासाट गर्दै रमालो समय बिताएका थिए।
"अर्को पटक आउँदा बिहे गर्छु"
दसैँको बिदा सकेर कार्यस्थल फर्कने क्रममा उनले परिवारसँग एउटा बाचा गरेका थिए— "अर्को पटक आउँदा धुमधामसँग बिहे गर्छु।" तर, दैवले उनको त्यो बाचा र परिवारको खुसीलाई सदाका लागि खोसेर लगेको छ। बिहेको मण्डपमा देख्ने परिवारको चाहना अब कहिल्यै पूरा नहुने गरी दिवस अस्ताएका छन्।
उनको निधनको खबरले गाउँ नै शोकमा डुबेको छ भने वृद्ध मातापिता र परिवार सम्हालिन सकेका छैनन्। एकमात्र छोराको अकल्पनीय निधनले श्रेष्ठ परिवारमा कहिल्यै निको नहुने चोट थपिदिएको छ।
मृतक दिवसको शवलाई नेपाल ल्याउनका लागि सरकारले आवश्यक पहल छिटो भन्दा छिटो अगाडि बढावस्, रोजगारीको यो तीतो यथार्थले पुनः एकपटक नेपाली समाजलाई मर्माहत बनाएको छ।