प्राप्त जानकारी अनुसार, उक्त एम्बुलेन्स पञ्चदेवल विनायक नगरपालिकाको मातहतमा रहेको बुझिएको छ। नगरपालिकाले नागरिकको स्वास्थ्य सेवालाई मध्यनजर गर्दै सञ्चालनमा ल्याएको एम्बुलेन्स व्यापारिक प्रयोजनका लागि प्रयोग भइरहेको देखेपछि स्थानीयले यसको तीव्र विरोध गरेका छन्।
"गाउँमा कोही बिरामी पर्दा वा आपतकालीन अवस्थामा एम्बुलेन्स खोज्दा पाइँदैन, फोन गर्दा बिग्रिएको वा तेल नभएको बहाना बनाइन्छ," एक स्थानीयले गुनासो पोखे, "तर त्यही एम्बुलेन्स व्यापारीको चाउचाउ र बिस्कुट बोक्न भने सहजै उपलब्ध भइरहेको छ। यो गरिब जनताको स्वास्थ्यमाथिको खेलवाड हो।"
एम्बुलेन्सजस्तो अत्यावश्यक सेवाको साधनलाई मालवाहक गाडीको रूपमा प्रयोग गर्नु कानुनविपरीत त हो नै, यसले स्थानीय सरकारको जवाफदेहितामाथि पनि गम्भीर प्रश्न खडा गरेको छ। कर छुटमा ल्याइएका यस्ता साधनहरूको दुरुपयोग हुनु दण्डनीय अपराध हो।
स्थानीयबासीले यस घटनाको निष्पक्ष छानबिन गरी दोषीमाथि कडा कारबाही गर्न र एम्बुलेन्सलाई नियमित तथा सुचारु रूपमा बिरामीको सेवामा मात्र लगाउन सम्बन्धित निकायको ध्यानाकर्षण गराएका छन्।