अछाम । अछाम जिल्लाको पञ्चदेवल विनायक नगरपालिका–२ मा जन्म भई हाल कम्प्युटर अपरेटर अध्ययन गर्दै आइरहेका हिमाल न्यौपाने Himal Neupane (HN Neupane)ले आफ्नै व्यक्तिगत वेबसाइटमार्फत अनलाइनबाट गर्न सकिने सरकारी सेवाहरू एकै प्लेटफर्ममा उपलब्ध गराएका छन्।
सरकारी सेवा लिन विभिन्न कार्यालय धाउनुपर्ने झन्झट, समय र खर्चको समस्यालाई ध्यानमा राख्दै न्यौपानेले नागरिकमैत्री वेबसाइट विकास गरेका हुन्। उक्त वेबसाइटमार्फत प्रहरी प्रतिवेदन (Police Report), लोकसेवा आयोग सम्बन्धी सेवा तथा जानकारी, प्यान कार्ड, राष्ट्रिय परिचय पत्र, राहदानी (पासपोर्ट) लगायतका महत्वपूर्ण सरकारी सेवाहरूको अनलाइन आवेदन र प्रक्रिया एकै ठाउँबाट गर्न सकिने व्यवस्था गरिएको छ।
ग्रामीण तथा दुर्गम क्षेत्रका नागरिकहरूलाई सरकारी सेवा सहज र छरितो रूपमा उपलब्ध गराउने उद्देश्यले यो वेबसाइट तयार गरिएको हिमाल न्यौपानेले बताए। “प्रविधिको प्रयोगमार्फत नागरिकको समय, श्रम र खर्च बचाउने लक्ष्यका साथ वेबसाइट निर्माण गरिएको हो,” उनले भने।
मोबाइलमैत्री र प्रयोग गर्न सजिलो बनाइएको उक्त वेबसाइटबाट विद्यार्थी, वैदेशिक रोजगारीमा जाने युवा, लोकसेवा तयारीमा रहेका उम्मेदवार तथा सर्वसाधारण नागरिकहरू प्रत्यक्ष लाभान्वित हुने अपेक्षा गरिएको छ।
स्थानीय तहमा जन्मिएका एक युवाले डिजिटल प्रविधिको प्रयोग गर्दै समाजसेवामा योगदान दिएको भन्दै स्थानीयवासीहरूले उनको पहलको प्रशंसा गरेका छन्। आगामी दिनमा थप सरकारी सेवाहरू, सूचना तथा डिजिटल सुविधा समेट्दै वेबसाइटलाई अझ विस्तार गर्ने योजना रहेको न्यौपानेले जानकारी दिए।
डिजिटल नेपाल अभियानसँग मेल खाने यस किसिमको प्रयासले स्थानीयदेखि राष्ट्रियस्तरसम्म सकारात्मक सन्देश दिने विश्वास गरिएको छ।